Andhra Pradesh Special Act For Teachers Transfers: ఏపీలో ఉపాధ్యాయుల బదిలీలకు ప్రత్యేక చట్టం రూపొందించాలని పాఠశాల విద్యా శాఖ నిర్ణయించింది. ఈ అంశంపై ఉపాధ్యాయ సంఘాల ప్రతినిధుల నుంచి అభిప్రాయాలు తీసుకున్నారు. ఉపాధ్యాయుల బదిలీలు, పదోన్నతుల అంశాలపై సంఘాలతో చర్చలు నిర్వహించారు. ప్రధానంగా టీచర్ల బదిలీలకు చట్టం తేవాలని ఏకాభిప్రాయానికి వచ్చారు. ప్రభుత్వ ఆదేశాలతో సంబంధం లేకుండా చట్ట ప్రకారం నిర్దేశిత కాలంలో బదిలీలు జరిగేలా చూడాలని భావిస్తున్నారు.
ఆంధ్రప్రదేశ్ ప్రభుత్వం కీలక నిర్ణయం తీసుకుంది. ఉపాధ్యాయుల బదిలీలకు సంబంధించి ప్రత్యేకంగా చట్టం తీసుకురాబోతోంది. ఈ ముసాయిదా బిల్లును అసెంబ్లీ సమావేశాల్లో ప్రవేశపెట్టేందుకు కసరత్తు జరుగుతోంది. టీచర్లు ఉద్యోగంలో చేరినప్పటి నుంచి పదవీవిరమణ వరకు మారుమూల ప్రాంతాలు, పట్టణ ప్రాంతాల్లో పనిచేసేలా చట్టాన్ని తీసుకొస్తోంది ప్రభుత్వం. రాష్ట్రవ్యాప్తంగా ఉన్న స్కూళ్లు ఉన్న ప్రాంతాలను నాలుగు కేటగిరీలుగా విభజించాలని నిర్ణయించారు. ఈ బదిలీలకు గరిష్ఠంగా 8 ఏళ్ల సర్వీసు కాగా.. కనీస సర్వీసు ఎంతనేది మాత్రం నిర్ణయం తీసుకోలేదు.
ముందుగా ప్రమోషన్లు ఇచ్చి, ఆ తర్వాత మాత్రమే ఉపాధ్యాయుల బదిలీలు చేపడతారు. ప్రతి ఏటా టీచర్ల బదిలీలను ఏప్రిల్‌లో ప్రారంభించి.. జూన్ ఒకటో తేదీకి పూర్తిచేస్తారు. ఆ తర్వాత జూన్ 12 నుంచి కొత్త స్కూళ్లలో టీచర్లు విధుల్లో చేరాలి. ఈ చట్టం వచ్చిన తర్వాత సిఫార్సు బదిలీలు లేకుండా చేయాలని ప్రభుత్వం భావిస్తోంది. కర్ణాటక, హిమాచల్‌ప్రదేశ్, అస్సాంలో మాత్రమే ఉపాధ్యాయుల బదిలీలకు సంబంధించి ప్రస్తుతం చట్టాలు ఉన్నాయి. టీచర్ల ప్రమోషన్లకు సంబంధించి ఇకనుంచి మెరిట్‌ కమ్‌ రోస్టర్‌ పాటించాలని ప్రభుత్వం భావిస్తోంది. డిసెంబరు నాటికి బదిలీలకు సంబంధించిన ఈ చట్టాన్ని అమల్లోకి తేవాలని ప్రభుత్వం నిర్ణయించింది.
అంతేకాదు బదిలీల చట్టంపై ఉపాధ్యాయ సంఘాల అభిప్రాయాలను తీసుకునేందుకు పాఠశాల విద్యాశాఖ ప్రత్యేక సమావేశం నిర్వహించింది. ఈ మేరకు ఉపాధ్యాయ సంఘాల నాయకులు చట్టానికి సంబంధించి పలు సూచనలు చేశారు. డీఎస్సీ ద్వారా ఉపాధ్యాయుడు డీఎస్సీ ద్వారా విధుల్లో చేరినప్పటి నుంచి పదవీవిరమణ పొందేవరకు అన్ని స్థాయిల్లో పనిచేసేలా చట్టం తీసుకురావాలని ఉపాధ్యాయ సంఘాలు ప్రభుత్వాన్ని కోరాయి. అలాగే మారుమూల ప్రాంతం కేటగిరీ నుంచి ఒక్కో స్థానం మారుతూ పట్టణాలకు వచ్చేలా బదిలీలు చేయాలని కూడా వారు సూచించారు.
ఉపాధ్యాయుల బదిలీలకు కనీస అర్హతగా రెండేళ్లు, తప్పనిసరి బదిలీకి గరిష్ఠంగా ఎనిమిదేళ్లు వంటివి ప్రస్తావించారు. అలాగే ఉపాధ్యాయ సంఘాల అధ్యక్ష, ప్రధాన కార్యదర్శులకు ప్రత్యేక పాయింట్లు.. ఏటా మే 31 వరకు ఉన్న ఖాళీలతో బదిలీలు చేపట్టాలంటున్నారు. ప్రమోషన్లకు ప్రత్యేక షెడ్యూలు, బదిలీలకు ముందే ప్రమోషన్లు చేపట్టాలంటూ.. విధివిధానాలను ఉపాధ్యాయ సంఘాలు తెలిపాయి. దీని కోసం ప్రత్యేకంగా జీవోను కూడా తీసుకురానున్నారు. ప్రస్తుతం టీచర్ల సీనియార్టీ జాబితాలు తప్పులుగా ఉన్నాయని.. వీటిని సరిచేయాలంటున్నారు. మెరికట్‌ కమ్‌సీనియారిటీ ప్రకారం ప్రమోషన్లు ఇవ్వాలని.. అంతేకాదు ఈ ప్రమోషన్లలో కూడా ఒక టీచర్‌కు రెండు సబ్జెక్టుల్లో అర్హత ఉంటే.. ఒక సబ్జెక్టులో పదోన్నతి వద్దనుకున్నా మరో సబ్జెక్టుకు కల్పించాలని కూడా కోరారు. అలాగే ఉపాధ్యాయులకు నచ్చిన సబ్జెక్టులో ప్రమోషన్ తీసుకునే అవకాశం కల్పించాలని కోరుతున్నారు. మొత్తానికి ప్రభుత్వం టీచర్ల బదిలీలకు సంబంధించి కీలక నిర్ణయం దిశగా అడుగులు వేస్తోంది.